Heldengedichte
Vor über 25 Johr, zur Faschingszeit,
im Februar, da wars me so weit,
gand zwei kleine Buabe mit rote Näs,
Faschingshuat und knallbunte Häs,
auf d'Nachbarsleit los
rings um dia Frühlingsstroß. (unsere Adr. Frühlingsstr)

Dr größre heißt Andi, der kleine isch dr Peter,
- mir hat ma's verzellt, a bißele später -
se klopfet an Tür, und wenn dia goht auf,
seit dr größre flott sei Sprüchle auf.
Jetzt isch dr kleine dra, dem fällt jetzt nix ei,
des isch doch koi Wunder, er isch au erst drei!

Dr größre sait leise dem Kleine ins Ohr
die erste Zeile, dr kleine saits vor;
dann nächste Zeile, leise ins Ohr,
und vom Peter wieder laut vor.
So goht des viermal hin und zurück,
bis fertig isch des Dichterstück.

"Lustig isch dia Fasenacht,
wenn mei Muatr kiachla backt;
wenn se aber koine backt,
pfeif i auf dia Fasenacht!"

De Leit hat des gfalle, se krieget viel gschenkt.
Kommt alles in de Beitel, den hand se umghenkt.
Gutsla, Schoklad und sogar no a Geld,
da waret die zwei a jeder a Held!

Doch mehrere Johr später, woher kommt jetzt des bloß,
war dr Lernfleiß beim Andi numma so groß.
A Gedicht zu leane bringt er als Hausaufgab mit,
doch er hat heit koi Luscht, er mag einfach it.
Am Nachmittag isch er mit seine Freind auf dr Gass,
und obends hat er auf de Lehrer an Hass,
weil er will Fuaßball luage, it "de Ribbeck" iabe;
des will er lieber auf nächste Morge vrschiabe.

Aber sei Muatr, die läßt ihm koi Ruah,
und dränglet ihn immer wieder drzua.
Bis ihm dr Krage platzt: "Jetzt lass mi doch sei;
i will heit it, heit got mir nix nei."

Sei Muatr, dia leanet abr so gern a Gedicht
und wenn dr Andi it leanet - er duats einfach nicht -
"nau learn es halt i" - Und se liest es laut vor,
während dr Andi schreit: "Tor!"
Dr Fußball isch spannend und alles drauf brennt,
außer dr Mama, die leaned s'Gedicht bis zum End.
Immer halblaut vor sich na, von Ribbecks Biera grad nett,
bis s'Fuaßballspiel aus isch, nau gand alle ins Bett.

Am nächste Morge - jetzt isch es so weit -
weckt se de Andi zum leane, es isch höchste Zeit.
Abr ihr werdet staune, dr Andi legt los
und sait sei Gedicht vom Afang bis Schluß.

Ihr gend es doch zu: dr Andi war schlau;
lässt d'Mama auswendig leane und er kann's jetzt au.
In dr Schual hat er's aufgsait, es gab zwar koi Geld,
aber ganz ohne leane - war er doch wieder a Held!